Sunday, November 11, 2007

الحب الاخوى..............

السلام عليكم ورحمة الله وبركاته

انا النهارده عايزة اكلمكم على بعض الانواع من الحب وهو الحب الاخوى

ليه كل ما نشوف ولد بيكلم بنت او العكس يبقوا بيحبوا بعض ولو سالنا حد فيهم وقالنا احنا اخوات مش بنبقى مصدقينه ونقول انه بيضحك علينا او مش عايز يحكيلنا

بس انا شايفه ان حب الاخوات احسن انواع الحب لانه بيكون حب خالص من غير اى شوائب
وممكن نسميه برده ارتياح للشخص اللى قدامى او احترام ليه او لقيت فيه حاجة مش لقيتها فى حد تانى مش لازم يبقى حب بالمعنى اللى احنا متعارفين عليه

وانا برده مقتنعه ان ممكن الحب الاخوى ممكن يتحول لحب حقيقى

انا عايزة اعرف رايكم ؟؟؟

معلش انا عايزة اوضح حاجة مش معنى انى كتبت الموضوع ده يبقى دة صح انا كتباه علشان اخد راى الناس وتاناقش ونحاول نقنع بعض

20 comments:

Anonymous said...

كلام جميل يا مروة

بس فى الأول نفتكر كلنا الايه اللى ربنا بيقول فيها
للنساء

محصنات غير مسافحات ولا متخذات أخدان

وللرجال
محصنين غير مسافحين ولا متخذي أخدان

عارفين الأخدان يعنى ايه ؟؟؟ يعنى صاحب

عارفة انا بردو كنت فاكرة زيك كده ان ممكن يكون فى حب أخوى ... وساعات الانسان بيكون أعمى وقلبه أعمى

بس صدقينى بجد بجد مافيش حاجة اسمها انا والولد ده اخوات

سورى يعنى ... الاخ محرم على اخته
اما الولد ده محلل
يبقى كده مش اخوات
دى بمنتهى البساطة
اما لو قولنا اننا اخوات يعنى مش هنفكر نرتبط ونحب بعض وكده
هقول ماشى بس الرسول قال ان ما اجتمع رجل وامرأه الا وكان الشيطان ثالثهما
سواء بقى كانوا فى الكلية .. على النت .. والشيطان بقى مابيخليش حد فى حالة
هيفضل وراهم لغاية ما يزينهم لبعض
وينتهى بحب مش اخوى

عارفين ليه ربنا قال ولا متخذات اخدان
عشان المرأة بطبيعتها عاطفية وبتتأثر بسرعه
افرضى مثلا انا اعرف واحد وعلاقتنا اخوات وكده
وجه الشيطان اتشطر وقلبها لحب مش اخوى
والموضوع بدل ما يتجمع يتفركش
مين اللى هيتعب وهيتأثر ؟؟؟
اكيد البنت هتتأثر أكتر
لان ده طبعها
فربنا نهانا عن اننا نتخذ اخدان
وكمان الولاد والكلام ده فى سورة النساء عشان تتأكدوا

عارفة .... بمناسبة الحب وكده
الحب قبل " الزواج " غير مشروع
ايوه غير مشروع

عارفين طبعا كلنا كما تدين تدان
الشاب اللى يقولك انا مصاحب واحده وحبى ليها حب أخوى وعادى وشغال كلام عليها مع صحابه
او مش بيتكلم عليها حتى
تخيلوا لو الشاب ده عرف ان اخته مصاحبه واحد وبتقوله حب اخوى ومعرفش ايه
ساعتها هايعمل راجل ويمسكها يقطعها
وعلى فكرة انا اعرف المثال ده بالظبط وحصل

ولا لما يتقدم لواحده ويكتشف انها كانت سورى مصاحبه او ماشية مع حد قبله
ساعتها بيقولك ايه
لا معلش انا ما احبش ارتبط بواحده كانت ماشية مع حد قبلى

شوفى يا مروة انا من خبرتى القليلة والتجارب بردو القليلة اللى خضتها
أنا بقولك كلمة حب دى ماتتقالش لاى سبب ولا لأى حد
ولا حتى واحد صحبى اقول احنا بنحب بعض حب اخوى
لا ده مش اخويا اصلا عشان اقوله حب اخوى ومش عارف ايه


انا عارفة ان الشباب اللى هنا هايقولوا انى بهاجم والكلام ده
بس لو كل واحد دور جواه هايلاقى انه لايصح الا الصحيح

طبعا مش كل الشباب ولا البنات زى بعضها
واكتر علاقة بحترمها بين البنت والولد هى علاقة الزمالة فقط
مش الاخوات والحاجات دى

مع ان الاختلاط حرام والحاجات الكتيرة دى
بس هنعمل ايه هو ده زماننا ومش هنعرف نغيره
الزمن يتغير براحته بس المهم احنا مانتغيرش


معلش اتاخرت عليكى فى الكومنتات
Majesty ;))

Anonymous said...

موضوع مثير للنقاش
بس انا مش هعرف ارد لوقتي ....ان شاء الله هرد ف اقرب وقت.
commandor

Unknown said...

ياخوفى :(

marmar said...

شكرا ماجيستى على كلامك الجميل ده

انا معاكى فى الايه لان دة كلام ربنا مش فيه كلام

بس احب اوضحلك حاجة ليه مفيش حاجة اسمها حب اخوى؟؟ ليه ممكن الولد يكون مرتبط بوحده وبيحبها جدا وبيكلم وحده تانيه بس زى اخته مش معقول مثلا هو هيفكر فى البنت التانيه على انها حاجة تانيه غير اخت او صديقه مثلا مش اى ولد يكلم بنت يبقى بيحبها

ومعلش انا مش معاكى فى حته ما اجتمع رجل وامراه الا وكان ثالثهما الشيطان
لانى انا مش قلت انهم هيقعدوا لوحدهم فى مكان مقطوع ولا حاجة اى ولد وبنت بيقعدوا مع بعض بيكون قدام الناس وباحترامهم

ومش كل الولاد وحشين او بيكون فى نيتهم حاجة من البنت اللى قدمهم زى ما فى ولاد وحشين فى ولاد كويسين وهكذا البنات برده علشان مبقاش منحازة لحد

وانا اعرف ولاد اما بيعرفوا ان اختهم بيحبوا ولد ولا حاجة بيحاولوا يتعرفوا عليهم ويشوف ان كان كويس ولا لا؟؟ وبيقنع اخته بالحقيقه

اما فى حته الاخ محرم على اخته اما الولد ده محلل انا مش قلت ان اى ولد نصاحبه يبقى اخونا لازم نختار الاصحاب او الزمايل فما بالك باللى انتى اعتبرتيه اخوكى يعنى مش اللى انتى بتكونى تكلميه مش يكون فى نيتك حاجة او نيته حاجة لازم يا جماعه يكون عندنا ثقه فى اللى بنكلمه شويه


لسه عندى كلام كتير بس حبه اشوف اراء الناس

al amir saied said...

اولا السلام عليكم ورحمة الله وبركاتة

واحب اشكرك جدا يا مروة على مواضيعك الحلوة دى اللى بتفتح مجال للنقاش بينا وبين بعض

الموضوع بتاعك جميل وانا معترض شوية معاكى يا ماجيستى رغم انى موافقك فى بعض الحاجات

بس انا من وجهة نظرى ان لية ميكونش فى حاجة اسمها حب اخوى هوة اللفظ تقيل شوية ممكن نقول اننا بنعتبر بعض اخوات بجد ممكن نعتمد على بعض فى بعض الحاجت ممكن نتكلم مع بعض فى حاجات بتكون مضايقانا شوية

بصى يا ماجيستى انا مقدرش اقولك ان كل الاولاد ملايكة او حلوين او ان كل البنات بردة حلوين

بس اكيد فى ناس كويسة فى الطرفين وانا بردة شايف ان افضل علاقة بين الاتنين تسمى الزمالة والاخوة فى الله

تحياتى

احمد عمر

theghost

Unknown said...

على فكرة يا مروة بخصوص الحته دى

ومعلش انا مش معاكى فى حته ما اجتمع رجل وامراه الا وكان ثالثهما الشيطان

ده حديث صحيح عن الرسول

Anonymous said...

وها قد عدنا من جديد:)
الحب الاخوي ..مقدمه مثيرة ..؟
لفظ اصحاب مش بعترف بيه في العلاقه بين الولد والبنت.
اخر العلاقه بين الولد والبت هي الزماله.صحيح بعض العلاقات دي بتطور لحب احيانا ..بس مش ده صميم كلامي
انا بتكلم علي الولد اللى بيقول ان البنت دي زي اختي ..هل بيراعي فعلا فيها حرمه كلمه (اختي). اممممم بصراحه سؤال محير؟
وهو ده اهم سؤال المفروض نسأله لاي واحد بيقول ان فلانه دي زي اختي...طبعا في ناس مثاليه الي حد ما في الموضوع ده ...بس للأسف مش كل الشباب كدا والبنت لازم تاخد بالها من حاجه زي دي...

ماجيستي كتبت ان لما الولد بيروح يتقدم للبنت ويعرف انها كانت ماشيه مع حد قبله بيرفض ..اه فعلا دي بتحصل كتير او علي الاقل لو مارفضش بيضايق جدا وبيكون مهموم ..
ولذلك اي بنت بتكلم ولد المفروض يكونو في نطاق الزماله.وبلاش المسميات التانيه دي اللى بتحسسنا بالامان وخلاص. في كلام تاني برده بس مش مهم دلوقتي:)

علي فكرة كلامك جميل يا مريم وواقعي:)

تحياتي،،
commandor

marmar said...

معلش يا ماجيستى اسمحيلى اقولك نفس اللى اتقال فى فيلم (فيلم ثقافى)ان الشيطان موجود بس احتمال انتصارة عليهم مش معروف

لان الرسول ـ ص ـ قال وثالثهما الشيطان مش وغلبهما الشيطان

شكرا على ردك كتير

Anonymous said...

يا جماعه كلام مريم مظيوط والحديث صحيح
وافضل علاقه بين الولد والبنت هي الزماله...

وبلاش نعد نول ده اخويا ودي اختي بلاش الكلام اللى هو يطمن ده واحنا مش حاسين باللي بيحصل حوالينا..

سلام
commandor,,

marmar said...

معلش انا عايزة اوضح حاجة مش معنى انى كتبت الموضوع ده يبقى دة صح انا كتباه علشان اخد راى الناس ونتناقش ونحاول نقنع بعض

Unknown said...

أنا فاهمة انك كتباه للمناقشة بس ومافكرتش انك بتتكلمى بمحمل شخصى .. انا واخده فى بالى انه موضوع عام ماتقلقيش

معلش يا ماجيستى اسمحيلى اقولك نفس اللى اتقال فى فيلم (فيلم ثقافى)ان الشيطان موجود بس احتمال انتصارة عليهم مش معروف

لان الرسول ـ ص ـ قال وثالثهما الشيطان مش وغلبهما الشيطان


مع انى قولت مش هشارك فى البوست ده تانى بس يلا زى بعضه ;))

بصى يا مروة فى اول كومنت ليا ... انا مكنتش بتكلم ان ثالثهما الشيطان ان هيحصل حاجة بينهم غلط لا سمح الله
ومع ان ده بيحصل احيانا
بس انا كان كلامى زى ما البوست بيقول
وهو فقط على ان الحب الاخوى ممكن الشيطان يحوله لحب مش أخوى

أما الوقوع فى المعصية دى حاجة كبيرة قوى وليها اسمها فى القران والاتنين هو وهى اسمهم موجود فى القران وبردو عقابهم فى القران
عشان بس اوضح الصورة والفكرة اللى كلامى بيدور حواليها

مجرد ان الشيطان يكون معاهم ويشتغل عليهم ويحول من حب اخوى لحب مش اخوى كده يبقى فاضل ايه تانى عشان يغلبهم ولا مايغلبهمش
بلاش كده

ان الشيطان موجود بس احتمال انتصارة عليهم مش معروف

مجرد ان الشيطان يقولهم انكم بتحبوا بعض حب اخوى يبقى كده انتصر عليهم
ده الباب ياجماعة

الشيطان ليه اسلوبه اللى بيعمينا بيه ويخلينا نحلل الحرام
وبردو انا هرجع اكرر الكلام اللى فى الكومنت الاول
الاخ محرم على اخته
اما الولد ده محلل

حديث عن الرسول عليه الصلاه والسلام مش فاكره نصه بالظبط بس فيما معناه ان
الحلال بين والحرام بين وبينهما امورا متشابهة فاتقوا الشبهات فمن وقع في الشبهات وقع في الحرام كالراعي يرعى حول الحمى يوشك ان يقع بها
ومن اتقى الشبهات فقد استبرأ لدينه وعرضه


كويس انك فكرتينى بالافلام
هجيبلكم فيلم جميل جدا مدته 18 دقيقة بس
عشان نعرف الشيطان بيضحك علينا ازاى
وان لكل بنى ادم بيتعامل معاه الشيطان باسلوب معين ويقنعه انه صح

وياريت محدش يكون اتضايق من كلامى .. اصلى بحب الصراحه
وشكرا يا بشمهندس كوماندور على كلامك

Majesty :)

marmar said...

معلش يا مريومه ان كان كلامى زعلك بس صدقينى مكنشى قصدى حاجة بس انا حبيت اقتنع ان تفكيرى فى حته غلط

وياريت مكنش قلتلك حاجة بدون قصدى والله خليتك تقررى انك مترديش فى البوست تانى وياريت تفضلى تردى على المواضيع علشان انا بكتب المواضيع علشان نتناقش واللى عنده مشكله فى حته معينه نصلحاله واحلى حاجة اننا نتعلم من بعض واحسن حاجة المناقشه فى الدين

وانا اسفه لتانى مرة لو قلت حاجة تزعلك

Unknown said...

لا خالص والله يا مروة
انا مكنتش هشارك عشان مايحصلش جدال فى الدين زى اللى كان حصل فى المنتدى الفترة اللى فاتت
أنا بحب أقول رأيى واللى عندى وحسه انه صح بس ما بجبرش حد انه يقتنع من غير مايكون فعلا مقتنع

فأنا قولت انا كتبت اللى نفسى فيه واكيد بردو عندهم عقل يفكروا بيه ويدورا الكلام فى دماغهم وربنا يهديهم

بس انا مش من النوع اللى اغصب على حد انه يقتنع بكلامى
انا للحظة حسيت معرفش ليه انه ممكن يحصل فيه جدال وشد بسبب الجملتين اللى قولتهم فى الاول

فقولت خلاص اعمل زى ما الرسول صلى الله عليه وسلم قال فى حديث

أنا زعيم ببيت في ربض الجنة لمن ترك المراء وإن كان محقا

بس دى الحكاية
مش موضوع انى زعلت ولا حاجة
وبجد بجد ده اكتر بوست استمتعت بالكلام فيه
لانى مش عايزاكم تعملوا حاجة زى دى
بجد انا شوفت تجارب وسمعت حكايات وناس ندمت انها عملت كده

ده خوف والله على البنات والشباب
البنات خايفه على سمعتهم ومستقبلهم فى بيوتهم
والشباب خايفه على ان ربنا يردهاله فى اخته او زوجته او حتى بنته لا قدر الله

ياجماعة بجد والله مفيش بين البنت والولد اى علاقة شرعية غير الزواج
غير كده تبقى زمالة وحتى من غير صباح الخير
مع ان الزمالة والاختلاط مش من الاسلام اصلا
بس دى فى الوقت ده والزمن ده أسلم حاجة

ناس بقى تحب تفسر ابتسامتك فى وجه اخيك صدقة انك توزع ابتسامات فى وش اى حد وبترمى الابتسامات على اى حد
لا خالص مش الابتسام يعنى انك تفرجنا على سنانك وانت ماشى لكل بنت او العكس
الابتسامه يعنى تكون بشوش ماتقابلش صاحبك وانت مكشر وعليك غضب ربنا
مش زى اللى بيوزعوا ابتسامات على الخلق

افكركم بقصه سيدنا موسى مع بنات سيدنا شعيب
لما بنت منهم راحت تقوله تعالى اسقى لنا وهى على استحياء
قالت له ايه
دخلت فى الموضوع على طول ولا حتى قالت السلام عليكم
قالت ان الدنيا زحمه وهم عايزينه يسقى لهم
مش قالت له
هاى صباح الخير .. نحب نتعرف انا اسمى فلانه وانت اسمك ايه
طب ممكن تسقى لنا
لا خالص
ولما سقى لهما مشى وخلاص
مش قالهم يعنى طب ده ايميلى لو حبيتى تسقى تانى ولا قالها انا اسمى موسى وانا فى المكان الفلانى لما تحبوا تسقوا ده رقم موبايلى

انا مش بتريق على سيدنا موسى ولا على بنات سيدنا شعيب
انا بقارن باللى حصل زمان ودلوقتى بيحصل
البنت تبقى واقفه مع الولد وتقوله اشطه يامعلم ازااااااااااى
ولا الولد يقولها كده اشطات عليكى وايه الرشاقة دى يابنتى

بجد مهزلة مهزلة
ياااااااااااااه خلصت الشحنه اللى عندى
مش كلها
اه فكرتينى بالفيلم

دى اللينكات على يوتيوب
ياريت بجد تحاولوا تنشروه يا جماعة

الجزء الأول
http://www.youtube.com/watch?v=4itzYuMArRM

الجزء الثانى
http://www.youtube.com/watch?v=moYhupQBdOE

اتفرجوا عليه وادعوا لى ربنا يهدينى ويثبتنى
وربنا يهدينا كلنا ويبعد عننا الشيطان
على فكرة يا مروة انا تقريبا هدمن مدونتك دى
مش عارفة ليه حسه ان الكلام هنا مريح عن المنتدى وبعرف اتكلم ؟؟

عموما ربنا يوفقكم كلكم يارب
Majesty :)

Anonymous said...

حصل خير يا جماعه وكلامك جميل ومقنع يا مريم
مع اني ضحكت كتير :d

شكرا يا مروة ع الموضوع المثير ده
وشكرا علي يا مريم علي الردود اللى استفدنا منها وعلي الفيلمين :)

commandor

marmar said...

والله يا مريم انتى بنت زى العسل وكلامك جميل جدا ومقنع والله حبيتك من كلامك بس

ويارب تفضلى تردى على طول وتمتعينا بكلامك اللى زى العسل ده

وشكرا على كلامك الجامد وشكرا على الفيلم

Anonymous said...

موضوع جميل جدا ...وحساس......احب علق بس يامروة على جملة انت قلتيها ...

يعنى مش اللى انتى بتكونى تكلميه مش يكون فى نيتك حاجة او نيته حاجة

ايوة الجملة دي

الشيطان بقا يامروة مهمته انه يلعب في النوايا دي.....احب اوضح حاجة ...بالنسبة للحديث اللي هو ما خلا رجل بامرا الا كان الشيطان ثالثهما...ده بيكلم اكتر على الخلوة ...بس ده مش معناه ...انهم لو قاعدين مع بعض في مكان عام ...الشيطان مش هيجي ...هيجي بردو.....بس عشان يعمل الخطوات ...اللي تخليهم يستلطفوا بعض ...يمكن في يوم من الايام يقدر يلم الشمل في مكان محدش فيه ...ولو مقدرش اقلها ...الحب الاخوي ده ...اذا صحت التسمية ...هيتقلب حب مش اخوي...

سدايني يامروة .....مفيش بين الولد والبنت اكتر من زمالة ....وكلام في حدود الضرورة بقدر الامكان ...


اللي بيقولوا عليهم اخوات دول ...بعملوا حاجات والله انا نفسي اكسف اعملها مع اخويا ....لما يتحول الهزار بينهم لضرب ...وضحك بصوت عالى ...وادينا بعدنا عن الحب خالص اهو ....

هل ده صح في وجهة نظرك ......حتى الولد اللي وافق معاها بيهزر ومبسوط ده ......هو كمان مش هيحترمها .......وزي ماقالت ماجستي ....يوم ما يجي يخطب ولا يجوز ....اخر وحدة هيدور عليها هي البنت دي واللي زيها ......


مفيش اجمل من الحياء ...هي البنت ايه غير سمعة وحياء......

مش شرط البنت تقع في الحرام والعياذ بالله عشان تخسر سمعتها .....

كل حاجة في البنت سمعة .....كل حاجة


اتمنى من ربنا انه يوفقنا جميعا

وكشر على الموضوع الجميل ده

whogeback said...

السلام عليكم ورحمه الله وبركاته
انا مختار سجلت مخصوص علشان الموضوع عجبني
انا في نفس الموقف ده ومش عارف اعمل ايه
الحب الاخوي اللي بيني وبينها اتحول لحب حقيقي بس من نحيتي انا بس وانا مش عاوز احسسها اني بحبها حب جواز وكده ومش عارف اعمل ايه خايف اخطبها تروح مني او اول حاجه اتعلق بيها تضيع مش عارف اعمل ايه ممكن لما حد يلاقي الحل يكلمني بس انا مقتنع ان مفيش حاجه اسمها حب اخوي ده يبقي اسمه حب وهمي tito_18_2007@yahoo.com بليز في اقرب فرصه

whogeback said...

السلام عليكم ورحمه الله وبركاته
الحب احنا منقدرش نتحكم فيه ممكن اننا حسين من نحيه الشخص ده انه ممكن يعوضنا عن اللي ضاع مننا بس ده سوري يبقي انانيه لانك عاوز تاخد منه اللي يرضيك ومش عاوز تديلو اللي هو يستحقه هو ده ملخص الموضوع بس انا بجد في الموضوع ده ومش عارف اعمل الايه انا خايف اصارحها تضيع مني والملاك الي حبيته والجنه اللي حلمت بيها يضيعو مني خايف يتحول الملاك لشيطان والجنه تبقي نار بس انا مش عارف بجد اسمه ايه الي انا فيه هو ممكن يكون صداقه صافيه
سوري انا هخرج عن الموضوع بس انا عندي مشكله
انا بحب واحده وكنا متفقين اننا حب اخوي بس انا حبيتها بجد وخايف اصرحها تضيع مني ممكن لما حد يعرف الحل اللي يحل المشكله دي يكلمني tito_18_2007@yahoo.com

Unknown said...

كلان لزيز جدا ومقنع بس بكده الانسان يعتمد ع نفسو وكل واحد يخليه ف حالو والدنيا مش هيكون فيها ولا جنه ولا نار

Unknown said...

فعلاا مافيش حاجه اسمها حب اخوه لانه مهما أن كان ليتحول لحب حقيقي أو لحب وهمي وبتبقا حاجه صعبة وموجعه اووي ممكن بعد الصداقة والحب ده نخصر ونرجع تاني وكان شئ لم يكن طبعاا أنا حصل معايا موقف زي كده وتعبت اوووي منه بس الحمدلله هو انتهي بفراق بس حقيقي دلوقتي هو مش اكتر من وكنت اتمني حقيقي يكون اخويا لاني اتحرمت من حنان اخ او بمعني أوضح انا معنديش اخويا كنت اتمني يكون عندي اخ جداا بس الحمدلله ع كل حال